The Power and Precision of Journalistic Translation
ئەمڕۆ (٣٠ـی نیسانی ٢٠٢٤) لە ھۆڵی بەڕێوەبەرایەتی گشتی ڕۆشنبیری و ھونەری گەرمیان بەئامادەبوونی(پ.د.ئومێد رفیق فتاح) سەرۆکی زانکۆی جیهان- سلێمانی(جەلال شێخ نوری )سەرپەرشتیاری ئیدارەی گەرمیان و (پ.د.فرهاد قادر) سەرۆکی زانکۆی گەرمیان بە ئامادەبونی سەرۆکی دادگای تیهەڵچونەوەی هەردوو ناوچەی سلێمانی و گەرمیان و بەشێک لە دادوەرانی دیاری کوردستان و ژمارەیەک لە بەرپرسانی لایەنە سیاسیەکان و بەڕێوەبەری دامودەزگا حکومیەکان و مامۆستایانی زانکۆ، دیداری زانستی (دادوەر د.فەرهاد حاتەم بۆ پرسی ئەنفال)، لەلایەن زانکۆی جیهان – سلێمانی و زانکۆی گەرمیان لە شاری کەلاری ناوەندی ئیدارەی گەرمیان ئەنجامدرا.
لە دیدارەکەدا، بەدوو پانێڵ و نمایشێکی کورتە ڤیدیۆییەکی دێکۆمێنتاری لەسەر ژیانی و پێشانگایەکی وێنەیی تیشک خرایەسەر ژیانی ئەکادیمی و کاری دادوەری کۆچکردوو د.فەرهاد حاتەم، کە لەساڵانی رابردوودا وەک ئەندامی داواکاری گشتی لەگەرمیان و سەرۆکی فەرمانگەی داواکاری گشتی سلێمانی خزمەتی کردووە.
لە دەستپێکی دیدارەکەدا پ.د.فەرھاد قادر سەرۆکی زانکۆی گەرمیان وتاری ھاوبەشی نێوان زانکۆی گەرمیان و زانکۆی جیھان_ سلێمانی پێشکەش کرد . هەر لەم دیدارەدا مژدەی ئەوەمان دا بە دانیشتوانی سنوری گەرمیان کە دوای وەرگرتنی رەزامەندی وەزارەتی خوێندنی باڵاو توێژینەوەی زانستی و لایەنە پەیوەندیدارەکان و هاوکاری ئیدارەی ناوچەکەلقێکی زانکۆی جیهان لە دەڤەری گەرمیان دەکەینەوە ، ئێمە هەموو ئامادەییمان بۆ ئەم مەبەستە دەربڕیوە.
دواتر کورتە ڤیدیۆییەکی دێکۆمێنتاری لەسەر ژیانی دادوەر د.فەرھاد حاتەم نمایشکرا.
لە بەشێکی تری دیدارەکەدا دوو پانێڵی زانستی ئەنجامدرا ،
پانێڵی یەکەم لەژێرناونیشانی (ڕۆڵی دادوەر د.فەرھاد حاتەم لە پرسەکانی دادپەروەری و خزمەتکردنی کەسوکاری ئەنفالکراواندا) ئەنجامدرا و تیایدا چوار بابەتی زانستی پێشکەشکران کەبریتی بوون لە:
بەڕێوەبەری پانێڵ (د.ئاسۆ حمە شین عبدالکریم)
دادوەر ڕزگار محەمەد ئەمین (دادگای باڵای تاوانەکانی عێراق و مامەڵەی لەگەڵ کەیسی ئەنفال).
دادوەر عومەر ئەحمەد محەمەد (ڕۆڵ و کاریگەری دادوەر د. فەرھاد حاتەم لە پارستنی موڵک و ماڵی گشتی).
دادوەر بورھان ئەحمەد مەحمود (ئەزمونی پارێزەرایەتی دادوەر د.فەرھاد حاتەم ھەوڵەکانی لە پێناو پەرەپێدانی دەزگای داواکاری گشتی).
د.ڕێبوار محەمەد صالح (خوێندنەوەیەک بۆ ماستەرنامەی دادوەر د.فەرھاد حاتەم بەناونیشانی : ” المسؤولية المدنية الناشئة عن عمليات الانفال” ).
دوای وەرگرتنی پشویەک و کردنەوەی پێشانگای دادوەر د.فەرھاد حاتەم و کەسایەتییە یاساییەکان کەلەیەن چەند خوێندکارێکی بەشی یاسای زانکۆی گەرمیان ئامادەکرا بوو
پانێڵی دووەم دەستپێکرد .
لە پانێڵی دووەمدا کە لەژێر ناونیشانی: (تێڕوانینی یاسایی پرسی ئەنفال لە ڕوانگەی یاسایی نێوخۆیی و نێودەوڵەییدا) چوار بابەت پێشکەشکران کەبریتی بوون لە :
بەڕێوەبەری پانێڵ : (م.بیابان نوری رۆستەم)
پ.ی.د. عیباد روحی ( تاوانی Ecocide لە شاڵاوەکانی ئەنفالدا).
پ.ی.د.نوری حەمە سەعید حەیدەر (پرنسیپە ئاکارییەکانی جەنگ لە دەقەکانی شەریعەت و یاسای نێودەوڵەتی مرۆییدا : پرۆسەی ئەنفال بەنموونە).
ھاوڕێ پێشڕەو (ڕۆڵی دادوەر د.فەرھاد حاتەم لە ھەماھەنگی و ھاوکاری ڕێکخراوەکانی بواری ئەنفال و کەسوکاری ئەنفالکراواندا).
م.ی. گۆران حسێن ئەحمەد (ڕۆڵی دادگای تاوانکاری نێودەوڵەتی لە بەجینۆساید ناساندنی پرسی ئەنفال).
دوای تەواو بوونی چالاکییەکانی دیدارەکە ڕاسپاردەکانی دیدارەکە لەلایەن (پ.د.بەمۆ پەروێز ) سەرۆکی لیژنەی زانستی خوێندراییەوە، دواتر لەلایەن ھەردوو زانکۆوە ئاراستەی لایەنە پەیوەندیدارەکان دەکرێت بەمەبەستی کار لەسەرکردنی.
بە دابەشکردنی خەڵاتی ڕێزلێنان بەسەر بەشداربووانی پانێڵە زانستییەکان، کۆتایی بە چالاکییەکانی دیداری دادوەر د.فەرھاد حاتەم ھات.
Related posts
