لە هۆڵی خوێندنەوە بۆ جیهانی کار: ٨ ڕێچکەی کار کە بڕوانامەی بەشی وەرگێڕان بۆت دەکاتەوە

– دکتۆرا، سکۆلەرشیپی زانکۆی مۆناش- ئوسترالیا

– ماستەر، فولبرایتی زانکۆی سینیسیناتی- ئەمریکا

– مامۆستا لە بەشی وەرگێڕانی زانکۆی جیهان-سلێمانی

یەکێک لە هۆکارە هەرەپێشینەکانی هەڵبژاردنی بواری خوێندن لە خوێندنی باڵا ئەوەیە کە ئایا ئەو کەسە دەگەیەنێ بە کار یاخود نا. کەچی زۆرجار وەڵامەکان بۆ ئەم پرسیارە سنووردارن یا ناڕوونن بۆ خوێندکارەکە. وەکو یەكێک لە بژاردەکانی بەردەم خوێندکار، دەکرێ بواری وەرگێڕان ڕێڕەوێکی پیشەیی بێت. لەوانەی بپرسی: “باشە، بە بەکالۆریۆسێک لە وەرگێڕان دەتوانم چی بکەم؟” وەڵامی باو و کۆن ئەوەیە: “دەبی بە مامۆستا یان وەرگێڕێکی یاسایی.”

بەڵام ئەوە وەڵامی تەواو نیە! من ئەمڕۆ، لەم نوسینە هەوڵ دەدەم ئەوەتان بۆ ڕوون کەمەوە کە ئەو وەڵامە تەواو نیە. لە ڕاستیدا، بەشی وەرگێڕان، بۆ نمونە بەشی وەرگێڕان لە زانکۆی زانکۆی جیهان-سلێمانی، کلیلی کردنەوەی چەندان دەرگای جیاوازی پیشەییە کە لەوانەیە هەرگیز پێشتر بیرت لێ نەکردبێتەوە. ئەم بەشە تەنها فێری زمانێکی ترت ناکات، بەڵکو دەتباتە ناو جیهانێکی پڕ لە دەرفەتەوە.

لێرە پێنج ڕێگای پیشەیی دەخەمە ڕوو کە تۆ وەکو دەرچووی بەشی وەرگێڕانی زانکۆی زانکۆی جیهان-سلێمانی دەتوانی بیگریەبەر:

١. دەتوانی ببیت بە پەروەردەکار و بنیاتنەری نەوەی نوێ، ببیت بە مامۆستای زمانی ئینگلیزی

ڕاستە پیشەی مامۆستایەتی یەکێکە لە ڕێگا ناسراوەکان، بەڵام نابێت بە کەم سەیر بکرێت. ئەمڕۆ لە کوردستان، خواستێکی بەرچاو هەیە لەسەر مامۆستای زمانی ئینگلیزیی لێهاتوو و خاوەن بڕوانامە، بەتایبەت لە قوتابخانە نێودەوڵەتییەکان و پەیمانگا تایبەتەکاندا. دەرچووی بەشی وەرگێڕان تەنها زمان نازانێت، بەڵکو لە وردەکارییەکانی ڕێزمان، ڕستەسازی، و چۆنیەتیی گواستنەوەی بیرۆکە بە شێوەیەکی دروست تێدەگات. ئەمە وای لێدەکات ببێتە مامۆستایەکی لێهاتوو کە نەوەیەکی نوێی زمانزان و کراوە بە ڕووی جیهاندا پەروەردە دەکات.

٢. دەتوانی ببیت بە پارێزەری وشە، ببیت بە وەرگێڕی یاسایی/قانونی

یەکێک لە وردترین، هەستیارترین، و بەرزترین بوارەکانی وەرگێڕان، کاری یاساییە. لە وەرگێڕانی گرێبەستەکان و بەڵگەنامەکانی دادگاوە بگرە تا دەگاتە دۆسیەکانی کۆچ و ڕەگەزنامە، یەک وشەی هەڵە دەتوانێت چارەنووسی کەسێک یان کۆمپانیایەک بگۆڕێت. ئەم بوارە پێویستی بە بەرپرسیارێتییەکی گەورە و شارەزاییەکی تەواو هەیە لە زاراوە یاساییەکان. دەرچووانی بەشی وەرگێڕان لە زانکۆی زانکۆی جیهان-سلێمانی کۆرسی “وەرگێڕانی یاسایی” دەخوێنن، ئامادە دەکرێن بۆ کارکردن لە نوسینگەی پارێزەران، کۆمپانیا گەورەکان، و دامودەزگا حکومییەکان، کە متمانە و وردبینی بنەمای سەرەکیی کارکردنە.

٣. دەتوانی ببیت بە پسپۆڕی میدیا و ڕۆژنامەوانی، ببیت بە دەنگ و قەڵەمی شاشەکان

سەیری کەناڵە بەهێزەکانی کوردستان وەک کوردسات و ڕووداو بکە، هەموو ئەو هەواڵە نێودەوڵەتیانە، ئەو فیلمە دۆکیۆمێنتاریانە، و ئەو چاوپێکەوتنانەی کە دەیانبینیت، پێویستیان بە وەرگێڕی لێهاتوو هەیە. لە بەشی وەرگێڕان، لە ڕێگەی کۆرسەکانی وەک “وەرگێڕانی میدیایی” و “وەرگێڕانی بینراو و بیستراو (ژێرنووس و دۆبلاژ)Audiovisual Translation “، خوێندکارانمان ئامادە دەکەین بۆ ئەوەی ببنە بەشێک لەم جیهانە خێرایە. ئەوان فێر دەبن چۆن پەیامی میدیایی جیهانی بە شێوەیەکی ورد و خێرا بگوازنەوە بۆ بینەری کورد.

٤. دەتوانی ببیت بە پردی پەیوەندییە نێودەوڵەتییەکان، ببیت بە وەرگێڕی دیپلۆماسی

هەولێری پایتەخت بووەتە ناوەندێکی گرنگی دیپلۆماسی و ژمارەیەکی زۆر کونسوڵخانە و نوێنەرایەتی وڵاتانی لێیە. هەموو ئەم دامەزراوانە پێویستیان بە وەرگێڕی زارەکی (شەفەییی) (Interpreting) ـی شارەزا هەیە بۆ کۆبوونەوەکان و وەرگێڕی نووسین بۆ بەڵگەنامە فەرمییەکان. کۆرسەکانیوەکو “وەرگێڕانی زارەکی هاوکات (Simultaneous Interpretation)” لە بەشەکەماندا، خوێندکاران ڕادەهێنن لەسەر ئەو فشار و وردەکارییەی کە ئەم ئیشە هەستیارە پێویستی پێیەتی. دەرچوویەکی ئەم بەشە دەتوانێت ببێتە دەنگی کوردستان لە کۆڕە نێودەوڵەتییەکاندا.

٥. دەتوانی ببیت بە گەیێنەری پەیامی مرۆڤایەتی، کار بکەیت لەگەڵ ڕێکخراوە ناحکومیە ناوخۆیی و نێوەدەوڵەتیەکان(NGOs)

کوردستان میوانداری سەدان ڕێکخراوی مرۆیی ناوخۆیی و نێودەوڵەتی دەکات لە گشت شارە گەورەکانی. ئەم ڕێکخراوانە پێویستیان بە وەرگێڕ هەیە بۆ نووسینی ڕاپۆرتەکان بە چێژێکی ناوخۆیی و کولتوری خۆمانە لە ڕێگەی قسەکردن لەگەڵ خەڵک لە مەیدانی کاردا، و گەیاندنی پەیامەکانیان بە جیهان. ئێمە لە بەشی وەرگێڕانی زانکۆی جیهان-سلێمانی شانازی دەکەین کە مامۆستامان هەیە خۆیان ساڵانێکی زۆر ئەزموونی کاریان لەگەڵ ئەم ڕێکخراوانەدا هەیە و ئەزموونی ڕاستەقینەی خۆیان دەگوازنەوە بۆ ناو پۆلی خوێندن.

٦. دەتوانی ببیت بە خاوەن کاری خۆت، کاری سەربەخۆ و ئۆنلاین (Freelancing) بکەی

لە سەردەمی ئینتەرنێتدا، سنوورەکان مانایان نەماوە. دەرچوویەکی بەشی وەرگێڕان دەتوانێت لە ماڵەکەی خۆیەوە لە سلێمانی یان دهۆک، کار بۆ کۆمپانیایەک لە ئەڵمانیا یان کەنەدا بکات. ئێمە خوێندکارانمان ئاشنا دەکەین بە نوێترین تەکنەلۆژیای وەرگێڕان (CAT Tools) و پلاتفۆرمەکانی دۆزینەوەی کار و بەکارهێنای ژیری دەستکرد کە یارمەتیان دەدات خێراتر و پیشەییتر کار بکەن و ببنە بەشێک لە بازاڕی کاری جیهانی. ئەمە واتە ئازادیی زیاتر و داهاتی باشتر.

٧. دەتوانی ببیت بە کلیلی بازرگانی و یاسا، ببیت بە وەرگێڕێکی پسپۆڕی یاسا و بازرگانی

هەر گرێبەستێکی نەوت، هەر ڕێککەوتنێکی بازرگانی نێودەوڵەتی، یان هەر دۆسیەیەکی یاسایی کە لایەنێکی بیانی تێدابێت، پێویستی بە وەرگێڕێکی یاسایی یان تەکنیکیی وردبین هەیە. یەک هەڵەی بچووک دەتوانێت ببێتە هۆی زیانی ملیۆنان دۆلار. لە ڕێگەی کۆرسە تایبەتمەندەکانی وەک “وەرگێڕانی یاساییLegal Translation ” و “وەرگێڕانی تەکنیکیTechnical Translation “، ئێمە خوێندکارانێک پەروەردە دەکەین کە دەتوانن متمانەی گەورەترین کۆمپانیا و دامەزراوەکان بەدەست بهێنن.

٨. دەتوانی ببیت داڕێژەری دەقی جیهانی دیجیتاڵ، ببیت بەوەرگێڕی سۆشیال میدیا و مارکێتینگ

سەیری پەیجی ئینستاگرام و فەیسبووکی براندە ناوخۆییەکان و کۆمپانیاکانی ڕیکلام بکە. هەموویان دەیانەوێت بە شێوەیەکی سەرنجڕاکێش بگەنە کڕیاری کورد و بیانی. لێرەدا ڕۆڵی “وەرگێڕی ڕیکلامی” دەردەکەوێت. ئەم کارە تەنها وەرگێڕانی وشەبەوشە نییە، بەڵکو داڕشتنەوەی داهێنەرانەی پەیامی براندەکەیە بۆ ئەوەی لەگەڵ کولتووری بینەردا بگونجێت. دەرچووی ئێمە دەتوانێت ببێتە پسپۆڕی دروستکردنی ناوەڕۆکی دوو-زمانە بۆ سۆشیال میدیا و یارمەتی گەشەکردنی بازاڕی ناوخۆیی بدات.

کۆتایی

بڕوانامەی بەکالۆریۆس لە وەرگێڕان تەنها فێربوونی زمان نییە، بەڵکو وەبەرهێنانە لە کۆمەڵێک لێهاتوو گرنگی وەکوبیرکردنەوەی ڕەخنەگرانە، و چارەسەرکردنی کێشە، و وردبینی، و توانای دروستکردنی پردی پەیوەندی لە نێوان کولتوورە جیاوازەکان.

ئەگەر تۆ بەدوای بڕوانامەیەک دەگەڕێیت کە دەرگای چەندین بواری جیاوازت بۆ بکاتەوە و داهاتوویەکی پیشەیی مسۆگەر و پڕ لە هەلت بۆ دابین بکات، ئەوا بەشی وەرگێڕانی زانکۆی جیهان-سلێمانی هەڵبژێرە. بە هیوای سەرکەوتنت.

بەشی وەرگێڕانی ئینگلیزی لە زانکۆی جیهان سلێمانی، ساڵی ٢٠١٨ دامەزراوە و لە م بەشەدا خوێندکاران جگەلە فێربوونی زمانی ئینگلیزی، راهێنان لەسەر شێواز و تەکنیکەکانی وەرگێڕانی ئینگلیزی بۆ کوردی/عەرەبی ئەنجام دەدەن.

بۆ پەیوەندیکردن بە بەشی وەرگێڕانی ئینگلیزی

زانکۆی جیهان سلێمانی

٠٧٧٠١٢١٠٧٨٩-٠٧٥٠١٢١٠٧٨٩